اول شي بخبركم انا كنت اعاني من حب الشباب وعالجته الحمد لله بس بقت الاثار
والحفر والندب ….وايد كانت مسببتلي ازعاج … انا من النوع اللي ما احط فاونديشن وبودره
وهالسوالف عشان جيه متعايشه مع الحفر وراضيه فيها بس وقت المناسبات والاعراس احس ويهيييييييي مب
شي لما ينحط له ميكب لانه الحفر وايد تبين وهالشي كان وايد يضايقني….
طبعا انا من 2004 كنت اسوي جلسات ليزر للحفر ف عيادة جلديه ف بريطانيا …
وبعدين سويت ليزر للحفر وتقشير ف هلث سبا ف بريطانيا …ولما رديت عمان استمريت ع
جلسات الليزر عن ف عياده لدكتوره مشهوره …وطبعا كنت مستانسه على سعر الجلسات بوايد ارخص
عن بريطانيا وكنت اسوي الجلسات كل 3 اسابيع … بعدين طحت على دكتور جلديه مشهور
وتميت اتعالج وياه لمده سنتين والله اني كنت اسوي جلسات تقشير كريستالي +ليزر لمدة سنه
عنده اسبوعيا:hysterical: كان معطني اوفر حلو حق الجلسات اسوي 4 جلسات ليزر للحفر ب 1000
درهم و5 جلسات تقشير كريستالي ب 600 درهم … عسب جيه كان عادي عندي اسير
له كل اسبوع عشان احصل نتيجه .. بعد السنه قلتله اني خلاص مليت واصرف ع
الفاضي .. المشكله ان كل اللي كنت اسوي وياهم ليزر كانوا يعطوني جرعه امل ان
بشرتج حلوه والليزر يايب نتيجه يعني النيرسات والدكاتره عسب ما تملين منهم يعطون من هالكلام
انه تحسنت البشره والحفر خفن و و و من هالخريط ..وسويت مرتين فيلر انجكشن (يحقنون
ويهي بالابر عشان يرفعون الحفر ويخف العمق ومفعوله المفروض ست شهور…انا تم عندي شهر بس
!! ) . المهم انا قلت حق الدكتور خلاااص مليت مابا اواصل …قالي اوكي انا
يايب علاج يديد هالكلام كان ف شهر 11/2009 وخبرني عن الديرما رولر وعطاني معلومات وتميت
ابحث ف النت وحسيت انه نايس وممكن يحل لي مشكلتي … وسويت الجلسه الاولى وحبيت
النتيجه صدق حسيت ان الحفر قلت وااايد ……….
وبعدين تميت اسويه كل ست اسابيع وبعدين مره كل اسبوعين …كل جلسه اتكلفني 1000 درهم….للعلم
الدكتور مايحطلي دوا ف ويهي ..على طول يمرر الرولر…من شهر 11/2009 الى شهر 8/2024 وانا
اسوي جلسات ويا الدكتور …
المهم اتعرفت ع نيرس تشتغل ف عيادة جلديه وهي وفرتلي الجهاز ب 500 درهم ويا
دوا خاص بالحفر ب 700درهم … واسويه بروحي ف البيت طبعا خلاص استخدم الطريقه البروفشنال
من كثر الجلسات اللي سويتها اعرف كيف استخدم الجهاز…وبديت اول جلسه بعد عيد الفطر يعني
ف نص شهر 9…واسوي ف الاسبوع جلستين…والنتايج وااااااااااو …. طبعا علمت اختي ع الجهاز …هي
استخدمت الجهاز ويا دوا النضاره وماشاء الله النتايج حلوه .. وحاليا تستخدمه ويا دوا لفتنغ
ونااايس,,,,
انصح كل وحده تبي تعالج بشرتها تستخدم هالجاز مع الادويه الخاصه به …وتتاكد من مصدر
الجهاز ..يعني لاتشترون من النت الا من الموقع الاصلي للديرمارولر..انا النيرس وفرته لي وهالجهاز والادويه
يستخدمونها ف عيادات الجلديه يعني اشياء مضموونه ..بس اللي ف النت فيه مواقع تجاريه اتبيع
بس المواد المصنوع منها الجهاز مب مرخصه طبيا …هالكلام بتقرونه ف الموقع الاصلي للجهاز انه
عندهم شهاده ترخيص طبيه للمواد اللي مصنوع منها الجهاز والابر ..
لان بعض انواع المعادن اللي يصنعون منها الابر والغير مرخصه طبيا تاثر على البشره وتسويلها
التهابات …:study:لا تقولون ما خبرتكم ….
احم لا تخافووون من شكل ويهي خخخخخ … واذكروا الله ع النتيجه الحلوه … هذي
صوري من شهر 9 لين 12….الفتره اللي سويت فيها الجلسات برووحي ف البيت ….بمعدل جلستين
ف الاسبوع بس قطعت ف الفتره من 7-22 نوفمبر لاني كنت بالحج….
الحمد لله التغير ملحوووووووظ ,,,,
للعلم تقريبا عدد الجلسات اللي سويتها بالبيت اكثر من 24 جلسه للحين وبسعر 1200 خخخخ
تقريبا سعر جلسه وحده ف العياده
هنيه نبذه عن الجهاز لطشتها من النت …
الاداة باختصار صممت لتجديد شباب البشره ومعالجتها من اغلب المشاكل المعروفه في مجتمعنا الخليجي ..
مثل
– ندبات حب الشباب Acne Scars
– المسامات الكبيره Large pores
– خطوط التمدد البيضاء والحمراء Stretch Mark
علامات التمدد باليدين والافخاذ والارداف والبطن بعد الحمل والولاده وبطن الركبه وكل العلامات بالجسم بعد
السمنه او الولاده .
– ازالة السلولايت cellulite اللي هي زي قشر البرتقال بالارداف .
– التجاعيد wrinkles
– تساقط الشعر او فروة الراس المصلعه hair loss
– ازالة اثار الحروق والجروح واثار التعرض للشمس .
– بهتان البشرة وفقدان بريقها الحاصل من قلة وجود الكولاجين بالبشره
كيفية عمل الالة :
عملية تثقيب ميكانيكي لطبقة الجلد الخارجي و السماح لامتصاص الكريم او الجل او السيروم عبر
الجلد و لتحفيز وحث الكولاجين الطبيعي في طبقات الجلد
لا تؤلم ولكن تدغدغ شئ بسيط وربما تدمع عينك او تعطسين عندما تجربينها لاول مره
على الخد .
ستلاحظين احمرار خفيف بالبشره وهذا دليل ان الابر توغلت ببشرتك واستفدتي منها وفي غضون ساعتين
بالكثير ان شاء الله يروح الاثر نهائي وتشوفين اللمعه بوجهك وتحسينه صار اكثر حيويه سبحان
الله .
الابر عندما تبدا تغزز ببشرتك تبدا خلايا بشرتك وخصوصا الكولاجين يدافع عن نفسه يبدا يفرز
كميات اكبر وتتجدد الخلايا وبكذا خليتي الكولاجين يظهر على طبقة الجلد الخارجيه بدل ماهو متخبي
.
